Багахангай дүүргийн Засаг даргын Тамгын газар Олон Улсын чанарын менежментийн тогтолцооны ISO 9001:2015 стандартыг нэвтрүүлж баталгаажилтын гэрчилгээгээ авлаа.

Орон нутгийн захиргааны байгууллагын үйл ажиллагааг оновчтой зохион байгуулж, менежментийн сайн түвшинд хүрэх, сайн засаглалыг бий болгох, төрийн албан хаагчдын мэдлэг, ур чадварыг нэмэгдүүлж, төрийн үйлчилгээний үр ашиг, үр нөлөөг дээшлүүлэх зорилгоор “Менежмент ба ур чадварын хүрээлэн” ТББ стандартыг хэрэгжүүлэх зөвлөх үйлчилгээг үзүүлсэн бөгөөд “Глобал Куалити” ХХК баталгаажуулалтын ажлыг хийж гүйцэтгэлээ. Олон Улсын чанарын менежментийн тогтолцооны ISO 9001:2015 стандартын баталгаажилтын гэрчилгээ гардуулах арга хэмжээг 2025 оны 02 дугаар сарын 05-ны өдөр зохион байгуулж төрийн байгууллагын 130 гаруй албан хаагчдыг хамруулан мэдээлэл хүргэлээ.

Чанарын менежментийн тогтолцооны ISO 9001:2015 стандартын талаарх мэдээллийг “Глобал куалити” ХХК аудитор Ц.Хишигжаргал танилцууллаа.

Дүүргийн Засаг даргын Тамгын газрын үйл ажиллагаанд чанарын менежментийн тогтолцооны ISO 9001:2015 стандартыг нэвтрүүлсэн мэдээллийг Засаг даргын Тамгын газрын дарга Л.Санжийжамц танилцууллаа.

Чанарын менежментийн тогтолцооны стандартыг дүүргийн хэмжээнд хэрэгжүүлэх, байгууллага хооронд туршлага солилцох, шаардлагатай модуль сургалтуудыг зохион байгуулах, төсөл хөтөлбөрүүдийг хамтран хэрэгжүүлэх зорилгоор “Хамтын ажиллагааны Санамж бичиг”-т Дүүргийн Засаг дарга А.Сүхболд, “Менежмент ба ур чадварын хүрээлэн” ТББ-ын Захирал Т.Мөнгөнбөгж нар гарын үсэг зурлаа.